«Ливерпуль»нинг янги футболчиси Александер Исак трансфер ойнаси ёпилишидан олдинги охирги кунда «Ньюкасл»дан мерсисайдликлар сафида қўшилгани ҳақида ўз фикрларини билдирди. Швед ҳужумчисининг ўтиши Англия Премьер-лигаси тарихида энг қиммати бўлди.
«Ўзимни ажойиб ҳис қиляпман. Бу йўл узун бўлди, аммо жамоанинг бир бўлагига айланаётганимдан жуда бахтиёрман. Бундан фахрланаман. Ҳаммаси якунланганидан хурсандман ва энди ишга қайтиш вақти келди. Жамоадошларим ва мухлислар билан учрашишни, яна майдонга чиқишни сабрсизлик билан кутяпман.
Ўйлайманки, клубга беришим мумкин бўлган жуда кўп нарса бор ва шу билан бирга ўзимда ишлашим керак бўлган жиҳатлар ҳам йўқ эмас. Мен ҳужумчиман, аммо ҳар доим жамоага имкон қадар кўпроқ фойда келтиришни истайман. Асосий вазифам — гол уриш, лекин фақат шу эмас. Мен ҳаммасига эришмоқчиман. Ҳа, айнан шундай», — дея Исакнинг сўзларини «Ливерпуль» расмий сайти келтирди.
ОАВ маълумотларига кўра, келишув қиймати 125 млн фунт (145 млн евро)ни ташкил этган. Александер Исак 2022 йил ёзидан бери «Ньюкасл» сафида тўп суриб келаётган эди.













