"Манчестер Сити" бош мураббийи Хосеп Гвардиола Премьер-лига доирасидаги "Манчестер Юнайтед"га (3:0) қарши баҳсда Жанлуижи Доннарумманинг ўйини ҳақида фикр билдирди.
26 ёшли дарвозабон якшанба куни бўлиб ўтган дербида "шаҳарликлар" сафида дебют қилди. Италиялик футболчи иккита зарбани қайтарди ва жамоасига қуруқ ғалабани қўлга киритишга ёрдам берди.
"Доннарумма жуда яхши эди! Ҳар доим хавфли бўлган бурчак зарбаларида, айниқса, Мбеумонинг зарбаси билан боғлиқ эпизодда, буни ҳамма эслайди. Менга ўша сэйв, шунингдек, Жанлуижининг ёнига югуриб келган Йошко, Рубен ва Родрининг реакцияси ёқди. Ҳар бир ўйинчи уни севишларини истайди. Айнан шундай пайтларда жамоа бирдамлик кўрсатади. Ўйинчилар хато қилганда бир-бирларини қўллаб-қувватлайдилар ва муваффақиятли ҳаракатлардан хурсанд бўладилар. Бу бирламчи - шундан кейингина тактика келади," - деди Гвардиола ўйиндан кейинги интервьюсида.
