"Бавария"нинг собиқ афсонавий футболчиси, ҳозирда Мюнхен клуби раҳбарияти аъзоси Карл-Хайнц Румменигге DPA нашрига берган интервьюсида Томас Мюллернинг қайтиши ҳақида гапирди.
"Клубимиз мухлислари ва раҳбарияти жамоанинг собиқ футболчиларини "Бавария" бошқарувида кўришни исташади. Ўйлайманки, Томас Шимолий Америкада янги тажриба орттирганидан сўнг, келажакда раҳбарлик даражасида масъулиятни ўз зиммасига олишига тўғри келишига маълум даражада тайёргарлик кўриши мумкин. У футболни энг юқори даражада ўйнаган, клубни жуда яхши билади, лекин директорлар кенгашидаги лавозим ёки менежерлик - бу майдондаги ишдан бутунлай бошқача".
Эслатиб ўтамиз, 36 ёшли Томас Мюллер ёзда "Бавария" билан шартномаси якунлангач, жамоани тарк этганидан сўнг ҳозирда "Ванкувер Уайткэпс" шарафини ҳимоя қилмоқда. У "қизиллар" сафида барча мусобақаларда 756 та ўйин ўтказиб, 250 та гол ва 276 та голли узатмани амалга оширган.
