Лондоннинг "Арсенал" клубининг ёзги янги хариди АПЛнинг 5-туридан ўрин олган "Манчестер Сити"га (1:1) қарши ўйинда тиззасидан жароҳат олди.
Журналист Саймон Коллинзнинг маълум қилишича, ҳозирда "канонирлар" сафидаги сўнгги ўйинда ўнг тиззасидан жароҳат олган Нони Мадуэке тиббий кўрикдан ўтмоқда. Мадуэкенинг жароҳати даражаси ҳозирча аниқ эмас, аммо клубдагилар 23 ёшли англиялик вингернинг бошига жиддий муаммолар тушишидан хавотирда.
Мадуэкенинг жароҳати ҳақидаги янги маълумот 23 сентябрь, сешанба куни тақдим этилиши кутилмоқда.
Жорий йилнинг ёзида "Арсенал" "Челси"дан Нони Мадуэкени қарийб 50 миллион фунтга сотиб олган эди. Жорий мавсумда у "канонирлар" сафида барча мусобақаларда олтита ўйинда иштирок этишга улгурди.
