Чемпионлар лигасининг янги регламенти янада мослашувчан бўлди. Унга кўра агар бирор футболчи жиддий жароҳат олиб, узоқ муддатга сафдан чиқса, клублар ўз қайдномасини ўзгартириши мумкин. Ҳимоячи Жованни Леони хочсимон боғламини йиртиб олганидан сўнг, "Ливерпуль" Чемпионлар Лигаси учун вингер Федерико Кьезани рўйхатдан ўтказди. Буни жамоа бош мураббийи Арне Слот ҳам тасдиқлади.
"Кьеза қайдномага киритилдими? Ҳа, биз бу масалани ўрганиб чиқдик. Бу жараён қайси босқичда эканлигини аниқ айта олмайман. Бу иш билан бошқа одамлар шуғулланади. Лекин билишимча, агар футболчи икки ойдан ортиқ муддатга сафдан чиққан бўлса, уни қайдномада алмаштириш мумкин. Одамларимиз бунинг устида ишламоқда," - деди Слот жума куни бўлиб ўтган матбуот анжуманида.
"Ливерпуль" шанба куни "Кристал Пэлас" меҳмони бўлади.
