"Барселона" футболчиси Френки де Йонг маоши ҳақида фикр билдирди. Аввалроқ, 28 ёшли ярим ҳимоячи клуб билан шартномасини узайтирган эди. Янги шартномага кўра, футболчининг маоши йилига олти миллион еврони ташкил этиши айтилганди.
"Мен янги шартнома бўйича қанча олишим мумкинлигини ҳисобламоқчи эмасман. Бу мавзуда доим гап-сўзлар, муболағалар кўп бўлган, лекин тўғри рақамлар эълон қилинмаган. Бу одамларга таъсир қилади. Агар улар менинг Европадаги энг юқори маошли футболчи эканлигимни ўқишса, менга бошқача қарашади. Бунда журналистларнинг ҳам айби бор," - дея де Йонгнинг сўзларини келтиради Marca.
Нидерландиялик 2019 йилда "Барселона"га кўчиб ўтган. Турли манбаларга кўра, футболчининг ўтган йилги шартномаси бўйича тўлови йилига 20 дан 37 миллион еврогача бўлган.
