Бугун Суперлиганинг марказий учрашуви — ОКМК ФК ва «Насаф» жамоалари ўртасидаги (1:1) қизғин баҳсни Ўзбекистон миллий терма жамоаси бош мураббийи Фабио Каннаваро бевосита стадиондан кузатди. Италиялик мутахассис Олмалиқ шаҳридаги футбол муҳитидан, мухлисларнинг фаол қўллаб-қувватлаши ва ўйин суръатидан катта таассурот олганини билдирди.

Учрашув танаффусида ОКМК ФК бош директори Баҳодир Мирзаев меҳмонни илиқ кутиб олиб, Олмалиқ-кон металлургия комбинатини акс эттирувчи эсдалик совғаларини тақдим этди. Шунингдек, Каннаварони клубнинг келгуси уй учрашувларига ҳам ташриф буюришга таклиф қилди.

Ўз навбатида Фабио Каннаваро бугунги беллашув юқори савияда ташкил этилганини, ҳар икки жамоанинг ўзига хос ўйин услуби ва ғалабага бўлган иштиёқи мухлислар учун завқли томошани тақдим этганини таъкидлади. У, шунингдек, Ўзбекистон футболида ёш истеъдодлар сони ортиб бораётганини, бу эса миллий терма жамоа истиқболи учун муҳим омил эканини қайд этди.