Парижнинг “ПСЖ” ярим ҳимоячиси Витинья фаолиятини Англия Премьер Лигасида давом эттириши мумкин. Caught Offside нашри хабарига кўра, “Ливерпуль” футболчини қишки трансфер ойнаси вақтида ўз сафига қўшиб олишни истамоқда.

Манбага кўра, “қизиллар” скаутлари 25 ёшли португалиялик футболчини техник жиҳатдан Европадаги энг иқтидорли ярим ҳимоячилардан бири деб ҳисоблайди. Шу боис уни харид қилиш устида ишламоқда. Агар келишувга эриша олса, қишда футболчи билан шартнома имзолаши мумкин.  Париж клуби Витиньяни трансфер қилишга тайёр эканлигини, бироқ бунинг учун камида 130 миллион евро миқдоридаги таклиф кутаётганини билдирган. Агар харидорлар футболчи учун мазкур суммани таклиф қилса, “ПСЖ” музокараларга киришади.

Шунингдек, Витиньяга “Ливерпуль”дан ташқари “Ювентус”, “Реал Мадрид”, “Бавария” ҳамда “Арсенал” каби клублар ҳам қизиқиш билдирмоқда.

Маълумот учун, жорий мавсумда Витинья барча турнирлар доирасида жами 16 та ўйинда майдонга тушиб, ўз ҳисобига 2 та гол ва 8 та голли узатма ёздириб қўйган. Унинг “ПСЖ” билан шартномаси 2029-йилнинг ёзигача амал қилади. Transfermarkt маълумотига кўра, ярим ҳимоячининг бозор қиймати 90 миллион еврони ташкил қилади.