"Манчестер Юнайтед" хўжайинлари, Глейзерлар оиласи мураббий Рубен Аморимнинг ишидан норозилик, шунингдек, беқарор спорт натижалари фонида чора кўрмоқчи. Футбол клубида кескинлик кучайиб бормоқда, деб ёзади Caught Offside.
Манбага кўра, клуб хўжайинлари юқори даражадаги шошилинч йиғилишни чақирган. Учрашувдан кўзланган мақсад жамоанинг бугунги кундаги ривожланиши, мухлисларнинг норозилиги кучайиб бораётгани, клубнинг молиявий ва умумий спорт истиқболлари ҳақида чуқур хавотирларни муҳокама қилишдан иборат. Директорлар кенгаши билан яқин алоқада бўлган манбаларнинг таъкидлашича, клуб хўжайинлари жамоанинг Чемпионлар лигасига йўлланма олиш борасидаги режалари барбод бўлишидан қаттиқ хавотирда.
Кеча "Манчестер Юнайтед" чемпионат аутсайдери "Вест Хэм" билан 1:1 ҳисобида дуранг ўйнади. Ушбу ўйиндан сўнг манкунианликлар Англия Премьер-лигаси турнир жадвалида саккизинчи ўринда бормоқда. Жамоанинг Чемпионлар Лигаси зонасидан ортда қолиши икки очкони ташкил этади.
