"Барселона" Бельгия ёшлар терма жамоаси ва "Брюгге"га алоқадор НКСТ клубининг 17 ёшли ҳужумчиси Жесси Бисивуга қизиқиш билдирмоқда. Бу ҳақда журналист Саша Тавольерига таяниб, Sport.es хабар берди.
Манбага кўра, "кўк-анорранглилар" спорт раҳбарияти бельгиялик футболчи ва унинг атрофидагилар билан учрашиб, уни ўз сафига қўшиб олиш бўйича келишувга эришган. Таъкидланишича, Бисиву ҳали келажаги борасида бир қарорга келмаган.
Жорий мавсумда Бисиву барча мусобақаларда 16 та ўйинда майдонга тушиб, 2 та гол ва 1 та ассистни ўз ҳисобига ёздириб қўйди. Футболчининг клуб билан амалдаги меҳнат шартномаси 2027 йилнинг ёзига қадар мўлжалланган. Transfermarkt порталида келтирилган маълумотларга кўра, футболчининг бозор нархи 800 минг еврони ташкил этади.
