«Бетис» клуби ва Испания терма жамоаси ярим ҳимоячиси Иско ўнг тўпиқ соҳасида артроскопик операцияни бошдан кечирди. Бу ҳақда «яшил-оқлар»нинг расмий сайти хабар берди.
Қайд этилишича, жамоа сардорига дастлаб консерватив даволаш усули белгиланган, аммо «Бетис» тиббий штаби даволаш жараёнини тезлаштириш мақсадида зарарланган соҳада бўғимни санация қилишга қарор қилган. Футболчининг майдонга қачон қайтиши ҳақида аниқ маълумот берилмаган. Бироқ аввалроқ ОАВда Иско янги йил бошида бўладиган учрашувларда жамоага ёрдам бера олмаслиги, чунки у тахминан бир ойни ўтказиб юбориши ҳақида хабарлар чиққан эди.
Эслатиб ўтамиз, 33 ёшли хавбек бир ой аввал Европа Лигасида «Утрехт»га қарши ўйинда (2:1) жамоадоши, марокашлик Софьян Амрабат билан тўқнашувдан сўнг тўпиқ соҳасида шикастланган эди. Жорий мавсумда Иско барча мусобақалар доирасида атиги икки ўйинда иштирок этиб, бир голли узатма амалга оширган. У жами 39 дақиқа майдонда ҳаракат қилди.













