"Эспаньол" ультрас мухлислар гуруҳи бугун, 3 январь куни бўлиб ўтадиган "Барселона"га қарши ўйин олдидан акция ўтказишни режалаштирмоқда.
Мухлислар жамоанинг собиқ дарвозабони Жоан Гарсиянинг асосий рақиби сафига ўтиб кетганига норозилигини майдонга каламуш ташлаш орқали ифодалашни ният қилишган. The Athletic нашри хабарига кўра, бундай акция мухлислар назарида хоинга айланган Гарсияга қарши норозилик рамзи бўлиши керак.
Маълум қилинишича, ультраслар тахминан бир ойдан бери бу провокация учун каламушларни қаердан топиш мумкинлигини излашмоқда. Стадион маъмурияти ва хавфсизлик хизмати ўйин пайтида юз бериши мумкин бўлган воқеаларга тайёргарлик кўрмоқда. "Эспаньол" мухлислари собиқ дарвозабонларининг энди "Барселона"да ўйнаётганини қабул қила олмаяпти.
2025 йил июнь ойида Жоан Гарсиа "Эспаньол"дан "Барселона"га ўтди ва 2031 йилгача шартнома имзолади.
