«Нефтчи» бугун Анталиядаги ўқув-йиғин машғулотлари доирасида илк назорат учрашувини ўтказади. Рақиб — Озарбайжоннинг кучли жамоаларидан бири «Қорабоғ». Ушбу жамоа ҳақида маълумот бериб ўтамиз.

Озарбайжоннинг энг кучли ва нуфузли клубларидан бири саналган «Қорабоғ» футбол клуби 1951 йилда ташкил этилган бўлиб, тарихан Оғдам (Қорабоғ) шаҳри билан боғлиқ. «Отлиқлар» лақаби билан танилган жамоа ўзининг рамзий отлари ва жанговор руҳи орқали мамлакат футболида алоҳида ўрин эгаллаб келмоқда.

Жамоа уй учрашувларини асосан «Азерсун Арена» стадионида ўтказади. Айрим йирик Европа беллашувлари эса Боку шаҳридаги Тофик Баҳрамов номидаги Республика стадионида бўлиб ўтади.

«Қорабоғ»ни 2008 йилдан буён мамлакат футболида энг муваффақиятли мураббийлардан бири саналган Гурбан Гурбанов бошқариб келмоқда. Клуб президенти лавозимида эса Тоҳир Гёзел фаолият юритади.

Ютуқлар жиҳатидан ҳам «Қорабоғ» Озарбайжон футболида етакчи ҳисобланади. Жамоа Озарбайжон Премьер-лигасида 12 марта чемпион бўлган (1993, 2013/14–2019/20, 2021/22–2024/25), шунингдек, Озарбайжон Кубогини 8 бор қўлга киритган.

Европа майдонларида ҳам «Қорабоғ» ўз изини қолдирган. Жамоа UEFA Чемпионлар лигаси гуруҳ босқичига чиққан илк озарбайжонлик клуб сифатида тарихга кирган (2017/18). Шу билан бирга, клуб UEFA Европа лигаси ва бошқа қитъа мусобақалари гуруҳ босқичида мунтазам иштирок этиб келмоқда.

Жорий 2025/26 мавсумида ҳам «Қорабоғ» Чемпионлар лигаси гуруҳ босқичида қатнашиб, Европа грандларига қарши баҳс олиб бормоқда ва ҳозирда гуруҳда 22-ўринни эгаллаб турибди.

«Нефтчи» ПФК матбуот хизмати