Португалия терма жамоаси ва "Манчестер Юнайтед"нинг собиқ вингери, Нани Қозоғистоннинг "Актобе" клуби футболчисига айланади. Бу ҳақда AmanVIBE телеграм канали хабар бермоқда.
Манбага кўра, 39 ёшли футболчи "Актобе" клуби билан шартноманинг барча шартларини келишиб олган ва тез орада жамоа йиғинига қўшилади. Нани бир йилга мўлжалланган меҳнат шартномасини тузади. Таъкидланишича, португалиялик ҳужумчининг маоши Қозоғистон Премьер-лигаси тарихидаги энг катта маош бўлади.
Нани 2007 йилдан 2015 йилгача "Манчестер Юнайтед"да ўйнаган. Манкунианликлар таркибида португалиялик футболчи тўрт марта Англия чемпиони бўлган, шунингдек, Чемпионлар лигасида ғолиб чиққан.
