Қозоғистон футзал ассоциацияси президенти Нурсултан Курман «Барселона» ва «Ювентус» клубларининг собиқ футболчиси Миралем Пьяничнинг «Актобе»га ўтиши нега амалга ошмай қолганини маълум қилди.

— Пьянич билан музокаралар олиб борилган, аммо менга етиб келган маълумотларга кўра, у қўйган шартлар жуда юқори бўлган. У ҳаддан ташқари юқори талаблар билдирган ва «Актобе» эса мулойимлик билан бу шартларни бажара олмаслигини айтган. Бу каби маълумотлар нафақат Қозоғистонда, балки ундан ташқарида ҳам тарқалаётгани — яхши сигнал. Футболчилар Нани ва Пьянич каби номзодлар кўриб чиқилаётганини билиб, клубда молиявий имконият бор, деб ўйлай бошлайди ва эътибор қаратади, — деди Курман.

Аввалроқ ОАВда Пьяничнинг «Актобе» билан шартнома имзолаши мумкинлиги ҳақида хабарлар тарқалган эди, аммо футболчининг агенти бу миш-мишларни рад этган.

35 ёшли босниялик футболчи 2025 йилда расман фаолиятини якунлаган. Унинг сўнгги клуби Москва ЦСКАси бўлган. Карьераси давомида Миралем 666 та ўйин ўтказиб, 77 та гол урган ва 132 та голли узатмани амалга оширган. У тўрт карра Италия чемпиони ҳамда икки карра Италия Кубоги соҳиби ҳисобланади.