«Реал» бош мураббийи Альваро Арбелоа Испания чемпионатининг 21-турида «Вильярреал»га қарши ўйинда (0:2) қозонилган ғалабадан сўнг жамоа ҳужумчилари Килиан Мбаппе ва Винисиус Жуниор ҳақида ўз фикрлари билан ўртоқлашди.

«Бу — дунёдаги энг яхши икки футболчи. Ўйин тақдирини тубдан ўзгартиришга қодир бўлган икки ўйинчи. Биз имкони борича кўпроқ тўпни назорат қилишга ҳаракат қиламиз. Вини қанотда тўпни қабул қилади, Мбаппе эса бўш ҳудудларга очилади. Улар ҳақида сизга янги бир нарса айтиб ўтирмайман. Аммо мен уларнинг ҳолати ва меҳнатидан жуда мамнунман.

Улар жамоага жуда садоқатли: биринчи бўлиб прессинг қиладилар, ярим ҳимоячилар билан ҳамкорлик қиладилар, фидойилик ва жипслик кўрсатадилар… ва бунинг мукофоти сифатида голлар киритилаётганидан жуда хурсандман», — дея Арбелоанинг сўзларини келтиради Managing Madrid.

Қайд этилишича, «Реал»нинг ғалабали серияси кетма-кет бешта учрашувга етди.