Айни пайт «Фулхэм»да ижара муддатини ўтаётган нигериялик қанот ярим ҳимоячиси Сэмуэль Чуквуэзе тезроқ асл клуби – «Милан»га қайтмоқчи. Ҳар ҳолда, у Африка кубогига йўл олишдан олдин acmilanfan.ru сайти ходимлари билан суҳбат жараёнида «россонерлар» лагеридаги муҳитни роса қўмсаётгани ва имкон туғилиши билан Италия чемпионатига қайтишни хоҳлашини яширмади.

– Англияда ўйнаб, «Милан»ни ҳам кузатяпсизми?

– Оҳ, «Милан»ни ёмон қўмсаяпман. Ахир гап иккинчи уйимга айланиб улгурган клуб ҳақида кетмоқда. Оилам ҳам Милан ҳаётига ўрганиб қолганди. Қисқаси, Лондонда мени соғинч азоби қийнамоқда. Милан яшаш учун ажойиб шаҳар, лекин футболчининг қисматида кўчиб юриш бор. Миҳими, жамоа ҳозир жуда яхши кетяпти, унга айни суръатни пасайтирмасликни тилайман. Унутманг, ҳамон «Ми­лан»га тегишли футболчиман. Шундай экан, клубга бефарқ қарашим мумкинми?

– Сизнингча, «россонерлар» жорий мавсум скудеттони юта олишадими?

– Жамоа жуда тетик ўйнамоқда. Агар футболчилар ўз устиларида тинимсиз ишлашда давом этсалар, чемпионликка эришиш имкониятлари ўз-ўзидан ошиб бораверади. Ишончим комил, «Милан» ҳозирги ҳолатида бемалол камида кучли тўртликка киради. Қолганини вақт кўрсатади. Ишонинг, мени «россонерлар» ҳақида ўйлашга ундайдиган сабаблар жуда кўп. Демоқчиманки, жамоанинг ишларидан сира кўз узмайман.

– Ўтган мавсум сизда айнан нима ўхшамади?

– Фикримча, «А» серияда ўзим хоҳлаган даражада вақт ва имконият олганим йўқ. Оқибатда ўйинимда ритм йўқолди. Лекин кўтарилиш ва пасайишлар футбол учун оддий ҳолат. Асосийси, ҳар қандай ҳолатда ҳам қаттиқ ишлашда давом этишингиз шарт. Имконият туғилса, «А» серия­га қайтишим мумкин. Эҳтимол, яна Ла Лигага ўйнарман ёки АПЛда қоларман…? Тўғри, инглиз футболи тактикаси ўйин услубимга кўпроқ мос келади итальянча футбол фалсафасига нисбатан. Шунга қарамай, тезроқ «Милан»га қайтишни истардим.

– «Милан»ни кузатаётган экансиз, Лука Модрич ҳақида нима дея оласиз?

– Ўтган ёз жамоа ихтиёрида эдим ва Лукани мен билан бирга шуғулланган энг яхши футболчилардан бири сифатида эътироф этишим мумкин. Модрич чиндан ҳам, идеал ижрочи. Мисол учун, тўп оёғига қачон тушишини сония­сигача билади. Ниҳоятда кучли футболчи, мана, қисқа вақт­да «Милан» услубини ўзида мужассам эта олди.

– Златан Ибрагимович шахсиятига ҳам тўхталсангиз…

– Ибрани ҳамма бирдек ҳурмат қилади, ҳам футбол, ҳам менталитет-характер нуқтаи назаридан. Златан билан кўришганингиз ва гаплашганингизда, беихтиёр унга нисбатан ҳурматингиз ошади, гапларини жимгина тинглайсиз. Чунки салобати бор. Златан қандай футболчи бўлганини айтишга эса ҳожат йўқ. Қисқаси, «Милан»да ҳамма Ибранинг фикрини инобатга олади, албатта. У футболчилар билан учрашганида, ҳаммада мотивация ошишини таъминлайди қандайдир сеҳрли тарзда.

М.ПЎЛАТОВ тайёрлади