Ayni payt «Fulxem»da ijara muddatini o‘tayotgan nigeriyalik qanot yarim himoyachisi Semuel Chukvueze tezroq asl klubi – «Milan»ga qaytmoqchi. Har holda, u Afrika kubogiga yo‘l olishdan oldin acmilanfan.ru sayti xodimlari bilan suhbat jarayonida «rossonerlar» lageridagi muhitni rosa qo‘msayotgani va imkon tug‘ilishi bilan Italiya chempionatiga qaytishni xohlashini yashirmadi.

– Angliyada o‘ynab, «Milan»ni ham kuzatyapsizmi?

– Oh, «Milan»ni yomon qo‘msayapman. Axir gap ikkinchi uyimga aylanib ulgurgan klub haqida ketmoqda. Oilam ham Milan hayotiga o‘rganib qolgandi. Qisqasi, Londonda meni sog‘inch azobi qiynamoqda. Milan yashash uchun ajoyib shahar, lekin futbolchining qismatida ko‘chib yurish bor. Mihimi, jamoa hozir juda yaxshi ketyapti, unga ayni sur’atni pasaytirmaslikni tilayman. Unutmang, hamon «Mi­lan»ga tegishli futbolchiman. Shunday ekan, klubga befarq qarashim mumkinmi?

– Sizningcha, «rossonerlar» joriy mavsum skudettoni yuta olishadimi?

– Jamoa juda tetik o‘ynamoqda. Agar futbolchilar o‘z ustilarida tinimsiz ishlashda davom etsalar, chempionlikka erishish imkoniyatlari o‘z-o‘zidan oshib boraveradi. Ishonchim komil, «Milan» hozirgi holatida bemalol kamida kuchli to‘rtlikka kiradi. Qolganini vaqt ko‘rsatadi. Ishoning, meni «rossonerlar» haqida o‘ylashga undaydigan sabablar juda ko‘p. Demoqchimanki, jamoaning ishlaridan sira ko‘z uzmayman.

– O‘tgan mavsum sizda aynan nima o‘xshamadi?

– Fikrimcha, «A» seriyada o‘zim xohlagan darajada vaqt va imkoniyat olganim yo‘q. Oqibatda o‘yinimda ritm yo‘qoldi. Lekin ko‘tarilish va pasayishlar futbol uchun oddiy holat. Asosiysi, har qanday holatda ham qattiq ishlashda davom etishingiz shart. Imkoniyat tug‘ilsa, «A» seriya­ga qaytishim mumkin. Ehtimol, yana La Ligaga o‘ynarman yoki APLda qolarman…? To‘g‘ri, ingliz futboli taktikasi o‘yin uslubimga ko‘proq mos keladi italyancha futbol falsafasiga nisbatan. Shunga qaramay, tezroq «Milan»ga qaytishni istardim.

– «Milan»ni kuzatayotgan ekansiz, Luka Modrich haqida nima deya olasiz?

– O‘tgan yoz jamoa ixtiyorida edim va Lukani men bilan birga shug‘ullangan eng yaxshi futbolchilardan biri sifatida e’tirof etishim mumkin. Modrich chindan ham, ideal ijrochi. Misol uchun, to‘p oyog‘iga qachon tushishini soniya­sigacha biladi. Nihoyatda kuchli futbolchi, mana, qisqa vaqt­da «Milan» uslubini o‘zida mujassam eta oldi.

– Zlatan Ibragimovich shaxsiyatiga ham to‘xtalsangiz…

– Ibrani hamma birdek hurmat qiladi, ham futbol, ham mentalitet-xarakter nuqtai nazaridan. Zlatan bilan ko‘rishganingiz va gaplashganingizda, beixtiyor unga nisbatan hurmatingiz oshadi, gaplarini jimgina tinglaysiz. Chunki salobati bor. Zlatan qanday futbolchi bo‘lganini aytishga esa hojat yo‘q. Qisqasi, «Milan»da hamma Ibraning fikrini inobatga oladi, albatta. U futbolchilar bilan uchrashganida, hammada motivasiya oshishini ta’minlaydi qandaydir sehrli tarzda.

M.PO‘LATOV tayyorladi