Мадриднинг «Атлетико» клуби «Интер» ярим ҳимоячиси Давиде Фраттезига даъвогарлар сафига қўшилди.
Маттео Моретто хабар беришича, «матрасчилар» 26 ёшли футболчини мавсум охиригача ижарага олиб, кейин сотиб олиш ҳуқуқини қўлга киритишни истамоқда. Бироқ «Интер»ни бундай формат қониқтирадими ёки йўқ — ҳозирча аниқ эмас.
Аввалроқ Фраттезига «Ноттингем Форест», «Наполи», «Ювентус» ва «Галатасарой» қизиқиш билдиргани айтилган эди. Transfermarkt портали унинг қийматини 28 млн евро деб баҳолайди. Футболчининг «Интер» билан шартномаси 2028 йилгача амал қилади.
