Украиналик футболчи Михайло Мудрик киберспорт платформаси Faceit томонидан 28 кунга блокланди. Бу ҳақда Риа Новости нашри хабар бермоқда.

Қайд этилишича, Мудрик Counter-Strike 2 ўйини вақтида полшалик рақиби билан юзага келган можаро чоғида чатда кескин ва ҳақоратли иборалар ишлатган. Хусусан, футболчи тарихий воқеа Волин фожиасини тилга олган (Волин фожеаси — бу Иккинчи Жаҳон уруши даврида 1943–1944 йилларда Волин ва Ғарбий Украина ҳудудларида содир бўлган қирғин — таҳр). Шундан сўнг полшалик фойдаланувчи Faceit маъмуриятига шикоят билан мурожаат қилган. Текширув якунида Мудрикнинг профили 28 кун муддатга блокланган.

Михайло Мудрик 25 ёшда. У 2023 йил январь ойида Украинадаги “Шахтёр” клубидан Англиянинг “Челси” жамоасига ўтган. 2024 йил декабрь ойида лондонликлар футболчининг допинг-тест натижаси ижобий чиққанини маълум қилган. Шундан буён Мудрик расмий учрашувларда майдонга тушгани йўқ.

Маълумот учун, 1943–1944 йилларда Украина ҳудудидаги Волин вилоятида Украина миллатчи ҳаракати (ОУН–УПА) ва Польша аҳолисининг ўртасида қонли тўқнашувлар бўлган. Шу даврда минглаб тинч полшаликлар ва украинлар ҳалок бўлган. Бу ҳодисалар иккала мамлакат тарихида чуқур из қолдирган ва ҳанузгача тарихий баҳс-мунозараларга сабаб бўлмоқда. 2016 йилда Польша парламентининг қуйи палатаси 11 июль санасини Иккинчи Польша Республикаси ҳудудида ушбу қўзғалонда ҳалок бўлган қурбонларни хотирлаш миллий куни сифатида белгилаган.