Лондоннинг «Арсенал» клуби марказий ҳужумчиси Виктор Дьёкереш январь ойи якунларига кўра жамоанинг энг яхши футболчиси деб топилди. Бу ҳақда клуб матбуот хизмати хабар бермоқда.
Швециялик ҳужумчи мухлислар овоз бериш жараёнида 48 фоиз овоз тўплади. Скандинавиялик футболчи бу борада Габриэл Жезус, Мартин Субименди ва Габриэл Мартинеллини ортда қолдиришга муваффақ бўлди.
Ўтган ойда Дьёкереш «тўпчилар» сафида саккизта учрашувда майдонга тушиб, ўз ҳисобига тўртта гол ва иккита голли узатмани ёздириб қўйди.
Ҳозирда «Арсенал» 53 очко билан Премьер-лига турнир жадвалида пешқадамлик қилмоқда. Навбатдаги баҳсда Микель Артета шогирдлари ўз майдони — «Эмирейтс» стадионида «Сандерленд»ни қабул қилишади.
