«Ливерпуль» собиқ футболчиси Жейми Каррагер Англия Премьер-лигасининг 25-туридан ўрин олган «Манчестер Сити»га қарши ўйинда (1:2) ярим ҳимоячи Доминик Собослаининг четлатилишига изоҳ берди.

Иккинчи бўлимга қўшиб берилган вақтда венгриялик хавбек Эрлинг Холандга нисбатан охирги чора фолини ишлатгани учун қизил карточка олди.

«Собослаидан аҳмоқона қарор. Менимча, шунчаки вазият давом этишига қўйиб бериш керак эди ва гол уриларди — ҳеч ким бундан шикоят қилмаган бўларди деб ўйлайман», — дея экспертнинг сўзларини келтирмоқда Metro нашри.

Ушбу ғалабадан сўнг «шаҳарликлар» пешқадам «Арсенал» билан орадаги фарқни олти очкогача қисқартиришди. «Ливерпуль» эса олтинчи ўринни сақлаб қолди — «қизиллар» ҳисобида айни дамда 39 очко мавжуд.