«Манчестер Сити» ҳужумчиси Эрлинг Холанд «шаҳарликлар» Премьер-лигада «Арсенал»ни қувиб ўтишга қодир эканлигига ишонади.

25-турда «Ливерпуль»ни (2:1) мағлуб этган «Сити» АПЛ турнир жадвалида 50 очко билан иккинчи ўринда бормоқда. «Арсенал» эса 56 очко жамғарган ҳолда 1-ўринни эгаллаб турибди.

«Биз чемпионлик пойгаси то охиригача етмагунча тугамаслигини аввал ҳам кўрганмиз. Шунинг учун ҳозир мен душ қабул қилишим, автобусга қайтишим, тикланишим, яхшилаб овқатланишим ва бор эътиборимни «Фулхэм»га қаратишим керак. Зеро, олдинда ҳали ўйинлар кўп», — деди Холанд «қизиллар» билан баҳсдан сўнг.

«Шаҳарликлар» 11 февраль куни Англия чемпионатининг 26-тури доирасида «Фулхэм»ни қабул қилади.