Мадриднинг «Реал» клуби собиқ устози Фабио Капелло клуб раҳбарияти учун Карло Анчелотти даражасидаги мутахассисни топиш деярли имконсиз бўлишини таъкидлади. Капелло Анчелоттини «Реал»нинг сўнгги 10–12 йиллик муваффақиятларининг асосий ижодкори деб ҳисоблайди.
«У кийиниш хонасини бошқаришда тенгсиз менежер. Ўйлашимча, Мадриднинг «Реал» клуби раҳбарияти учун бундай мутахассиснинг ўрнини боса оладиган номзод топиш жуда қийин бўлади», — дея Фабио Капеллонинг сўзларини «pianetamilan.it» нашри келтирмоқда.
Эслатиб ўтамиз, Карло Анчелотти 2025 йилнинг май ойида «Реал»ни тарк этиб, Бразилия терма жамоасини қабул қилиб олган эди. У «қироллик клуби»да икки давр мобайнида (2013–2015 ва 2021–2025 йиллар) фаолият юритиб, клуб тарихидаги энг кўп соврин юртган мураббийга айланди.
