«Бавария» дарвозабони Мануэль Нойер Германия терма жамоасига қайтиши мумкинлиги ҳақидаги саволга жавоб берди.

Жаҳон чемпионати арафасида Германия миллий жамоаси дарвоза чизиғида муаммоларга дуч келмоқда. Шу сабабли матбуотда яқин орада 40 ёшни қарши оладиган Мануэль Нойернинг «бундестим» таркибига қайтиши мумкинлиги ҳақидаги гап-сўзлар бир неча ойдан бери тинмаяпти.

Чоршанба куни мюнхенликлар Германия Кубоги 1/4 финалида «РБ Лейпциг»ни мағлуб этишди (4:0). Учрашув якунида журналистлар Нойердан унинг терма жамоадан кетишини якуний деб ҳисоблаш мумкинми ёки йўқлигини сўрашди. «Ҳа», — дея қисқа жавоб қайтарди «Бавария» сардори.

Эслатиб ўтамиз, Мануэль Нойер 2024 йилда терма жамоадаги фаолиятини якунлаган эди.