«Bavariya» darvozaboni Manuel Noyer Germaniya terma jamoasiga qaytishi mumkinligi haqidagi savolga javob berdi.

Jahon chempionati arafasida Germaniya milliy jamoasi darvoza chizig‘ida muammolarga duch kelmoqda. Shu sababli matbuotda yaqin orada 40 yoshni qarshi oladigan Manuel Noyerning «bundestim» tarkibiga qaytishi mumkinligi haqidagi gap-so‘zlar bir necha oydan beri tinmayapti.

Chorshanba kuni myunxenliklar Germaniya Kubogi 1/4 finalida «RB Leypsig»ni mag‘lub etishdi (4:0). Uchrashuv yakunida jurnalistlar Noyerdan uning terma jamoadan ketishini yakuniy deb hisoblash mumkinmi yoki yo‘qligini so‘rashdi. «Ha», — deya qisqa javob qaytardi «Bavariya» sardori.

Eslatib o‘tamiz, Manuel Noyer 2024 yilda terma jamoadagi faoliyatini yakunlagan edi.