Франция терма жамоаси устози Дидье Дешам дарвозабон Люка Шевальенинг Парижнинг «ПСЖ» клубидаги ҳозирги ҳолати ҳақида гапирди. Посбон асосий таркибдаги ўрнини йўқотди, ҳозирда россиялик Матвей Сафонов жамоанинг биринчи рақамли дарвозабонига айланган.
"Кузда Люка терма жамоа таркибидан Меньянни сиқиб чиқариши мумкинлиги ҳақида гапиришганди, аммо футболда ҳамма нарса тез ўзгаради. Ўйин амалиёти жуда муҳим. Ҳозирда Шевалье энг яхши ҳолатда эмас. Клубда барча қарорларни бош мураббий қабул қилади. Ҳамма нарса ҳали ўзгариши мумкин", — дея мутахассиснинг сўзларини келтиради «Lequipe».
Франция чемпионатининг жорий мавсумида 24 ёшли Шевалье 17 та учрашув ўтказиб, ўз дарвозасидан 13 та тўп ўтказиб юборди.
