"Милан" ярим ҳимоячиси Лука Модрич А Сериянинг жума кунги баҳсида "Пиза" (2:1) устидан қозонилган ғалабадан сўнг журналистлар билан суҳбатлашди.
40 ёшли хорватиялик футболчи учрашувнинг 85-дақиқасида "россонерилар"га ғалаба келтирган гол муаллифига айланди.
"Биз хато қилишга йўл қўя олмасдик. Бу очколар чемпионлик учун курашда ҳал қилувчи аҳамиятга эга эканини ҳамма жуда яхши тушуниб турарди ва биз ўз мақсадимизга эришдик. Иккинчи бўлимда бироз суръатни тушириб юбордик ва "Пиза"га ҳисобни тенглаштиришга имкон бердик, аммо кейин яна олдинга ўтиб, иккинчи голни урдик. Ғалабадан жуда хурсандмиз. Ўйиндан ўйинга ўз мақсадимиз сари боришимиз керак", — деди Модрич "DAZN" нашрига берган интервьюсида.
"Милан" 53 очко жамғарган ҳолда турнир жадвалида "Интер"дан (58) кейин иккинчи ўринни эгаллаб турибди.
