"Челси" устози Лиам Росеньор Англия Кубоги доирасида "Халл Сити"га қарши кечган баҳсда (4:0) хет-трик қайд этган Педру Нетунинг ўйини ҳақида ўз таассуротлари билан ўртоқлашди.

Португалиялик вингер 40, 51 ва 71-дақиқаларда рақиб дарвозасини ишғол қилди. Меҳмонларнинг яна бир голига Эстевао Виллиан муаллифлик қилди — у 59-дақиқада "йўлбарслар"ни ранжитди.

"Педру Нету шунчаки ажойиб эди. У жуда қаттиқ меҳнат қилади ва шу билан бирга юксак маҳоратга эга. Бугунги ўйинда унинг голли юришларини кузатиш жуда ёқимли бўлди. Барча ўйинчилар бир-бирлари учун курашдилар", — дея жавоб берди Росеньор Нетунинг хет-триги ҳақидаги саволга.

25 ёшли футболчи жорий мавсумдаги 38 та учрашувда ўнта гол уришга муваффақ бўлди.