Мадриднинг «Реал» клуби дарвозабони Тибо Куртуа бутун фаолияти давомидаги энг яхши сейви деб қайси вазиятни ҳисоблашини айтиб берди.

Бельгиялик посбон 2022 йилги Чемпионлар лигаси финалида «Ливерпуль»га қарши ўйиндаги сейвини алоҳида ажратиб кўрсатди.

«Энг яхши сейв? 2022 йилда Мане зарба берган вазиятдаги сейв. У марказга қараб ҳаракатланди ва мен чапга қадам ташлаган эдим, шу сабабли зарбани қайтариш учун тезкорлик билан йўналишни ўзгартиришим ва танамнинг вазнини ўнг томонга ўтказишимга тўғри келди. Бу жуда қийин эди. Тўпга аранг тегиб, уни устунга йўналтирганман», — дея Куртуанинг сўзларини келтиради «Madrid Universal».

Ўша финалнинг қаҳрамони айнан «қаймоқранглилар» дарвозабони бўлган эди — у «қизиллар»нинг дарвоза соҳасига йўллаган барча зарбаларини қайтарган. Мадридликлар 1:0 ҳисобида ғалаба қозониб, Чемпионлар лигаси ғолибига айланишган.