"Реал Сосьедад" клуби устози Пеллегрино Матараццо Мадриднинг "Реал" жамоаси билан кечган учрашув (1:4) якунлари ҳақида тўхталди.
"Бу қийин ўйин бўлди, биздан барча ҳаракатларда тўлиқ фаоллик талаб этиларди. Агар қайсидир жабҳада бу етишмаса, айниқса мадридликларга қарши баҳсда бунинг учун жазоланиш мумкин. Пенальти белгиланган вазиятларда позицион хатоларга йўл қўйдик. Бугунги воқеалардан кўп нарса ўрганишимиз керак", — дея мураббийнинг сўзларидан иқтибос келтирмоқда "Marca".
"Биринчи голни ўйин бошида ўтказиб юбордик, шунинг учун чарчоқни баҳона қилиб бўлмайди. Вақт ўтиши билан ҳақиқатан ҳам чарчоқ сезилди, лекин барибир бу ҳақда гапиришни ёқтирмайман".
"Пенальти? Иккала вазиятда ҳам контакт бор эди, гарчи Винисиус уни излаган бўлса-да. Бизнинг режамиз Винисиуснинг қанотдан ўтиб кетишини ёпиш эди, бироқ ҳар икки ҳолатда ҳам буни уддалай олмадик".
Ушбу учрашувдан сўнг "Реал Сосьедад" 31 очко билан саккизинчи ўринда бормоқда. Мадриднинг "Реал" клуби эса 60 очко билан биринчи ўринга кўтарилиб олди.
