Шанба куни «Бавария» «Вердер»ни 3:0 ҳисобида мағлуб этди. Харри Кейн ушбу ўйинда дубль қайд этди ва катталар футболидаги фаолияти давомида урган голлари сонини 500 тага етказиб олди. Инглиз футболчиси ушбу мавзуда ижтимоий тармоқларда пост қолдирди.
«Фаолиятимда 500 та гол уриш маррасига етганимдан жуда фахрланаман! Бу натижага эришишимда ёрдам берган жуда кўплаб инсонлар ва жамоадошларимга миннатдорчилик билдирмоқчиман», — деб ёзди Кейн.
«Бавария» Германия чемпионатида пешқадамлик қилмоқда ва иккинчи ўриндаги Дортмунднинг «Боруссия» жамоасини олти очкога ортда қолдирмоқда. Венсан Компани жамоаси навбатдаги ўйинини шанба куни, 21 февраль куни ўз майдонида «Айнтрахт»га қарши ўтказади.
