«Барселона» бош мураббийи Ханс-Дитер Флик ярим ҳимоячи Марк Берналь «Жирона»га қарши бўлажак дербида асосий таркибда майдонга тушиши мумкинлиги ҳақидаги саволга жавоб берди.
«Берналь доим ўйнашга тайёр. Асосий таркибни белгилаётганда, биз жамоанинг эҳтиёжларидан келиб чиқиб иш тутамиз. Майдонга тушишга тайёр бўлган барча футболчилар таркиб учун номзод ҳисобланади. Биз баъзи ўзгартиришларни амалга оширамиз... улар қанча бўлишини эса кўрамиз», — деди Флик журналистларга.
Эслатиб ўтамиз, 18 ёшли Берналь «Атлетико»га қарши кечган сўнгги кубок баҳсида (0:4) майдонда кўриниш бермади. У жорий мавсумда жами 18 та ўйинда иштирок этиб, битта гол ва битта голли узатмани амалга оширган.
