"Бенфика" ҳамда "Реал" ўртасидаги Чемпионлар лигаси учрашуви (0:1) можароли тус олди. Винисиус Жуниор Жанлука Престианнини ирқчилик руҳидаги ҳақоратларда айбламоқда, бироқ Лиссабон клуби футболчиси бу айбловларни рад этди.
Шу билан бирга, баъзи футбол ишқибозлари ўйиндан сўнг Винисиуснинг ўзини айблашди. У бурчак байроқчаси ёнида голни нишонлаш пайтида "Бенфика" мухлисларига нисбатан анча провокацион ҳаракатлар қилган эди.
Бу орада ижтимоий тармоқларда трибунадан олинган видео пайдо бўлди. Лавҳада ҳимоячи Антонио Рюдигер голни нишонлаётган жамоадошлари ёнига бориб, уларни тезроқ ўйинга қайтишга чақиргани акс этган. Шу билан бирга, Рюдигер трибуналарга қарата ишора қилиб, Винисиуснинг ҳаддан ташқари қўпол нишонлаши учун очиқчасига узр сўраган.
