«Ливерпуль» марказий ҳимоячиси Виргил ван Дейк жамоадоши Доминик Собослаининг етакчилик фазилатлари ҳақида гапириб ўтди.

25 ёшли венгриялик футболчи жорий мавсумда «қизиллар»нинг асосий ва ҳал қилувчи ўйинчиси мақомини тўлиқ мустаҳкамлади. Журналистлар жамоанинг амалдаги сардори ван Дейкдан келажакда ушбу ярим ҳимоячини сардорлик боғичида кўриш-кўрмаслиги ҳақида сўрашди.

«Аниқ бир гап айта олмайман, буни мураббий ҳал қилади. Собослаи ўзини жуда яхши кўрсата олди. Менимча, у яна бир қадам олдинга ташлаб, «Ливерпуль» етакчисига айланиши мумкин. Ҳамма нарса шахсий ўрнакдан бошланади ва у жорий мавсумда буни исботламоқда», — дея 34 ёшли нидерландиялик футболчининг сўзларидан иқтибос келтиради Англия ОАВлари.

Доминик Собослаи 2023 йилнинг ёзида «РБ Лейпциг»дан «Ливерпуль»га ўтган эди.