«Манчестер Сити» бош мураббийи Хосеп Гвардиола матбуот анжуманида иштирок этиб, жамоадаги кадрлар ҳолати ҳақида тўхталиб ўтди. Гвардиоланинг сўзларига кўра, вингер Жереми Доку ҳали майдонга тушишга тайёр эмас. Аммо бошқа бир вингер — Савио Англия чемпионатининг навбатдаги ўйинида жамоасига ёрдам бериши мумкин.
Шанба куни, 21 февраль санасида «Манчестер Сити» ўз майдонида «Ньюкасл»ни қабул қилади. Учрашув Тошкент вақти билан соат 23:00 да бошланади.
Айни дамда «Манчестер Сити» Премьер-лига турнир жадвалида иккинчи ўринни эгаллаб турибди. Хосеп Гвардиола шогирдлари битта кам ўйин ўтказган ҳолда, пешқадам «Арсенал»дан беш очко ортда қолмоқда.
