Испаниянинг «Барселона» клуби «Манчестер Сити» жамоасининг 31 ёшли португалиялик ярим ҳимоячиси Бернарду Силвани ўз сафига қўшиб олишга қизиқиш билдирмоқда. Футболчининг амалдаги шартномаси ёзда ниҳоясига етса-да, «шаҳарликлар» раҳбарияти у билан келишувни узайтириш ниятида эмас.

TEAMtalk нашрининг маълумотларига кўра, Бернарду Силва учун курашда «Барселона»дан ташқари Мадриднинг «Атлетико», шунингдек, «Монако» ва «Ювентус» клублари ҳам иштирок этмоқда. Қайд этилишича, «кўк-анорранглилар» сафига ўтиш имконияти Силвани юқори совринлар учун курашиш истиқболи билан кўпроқ ўзига жалб қилиши мумкин.

Бернарду Силва 2017 йилдан буён «Манчестер Сити» шарафини ҳимоя қилиб келмоқда. Жорий мавсумда португалиялик футболчи клуб миқёсида 35 та учрашувда майдонга тушиб, 2 та гол урди ва 5 та голли узатмани амалга оширди.