Нигериялик ҳужумчи Адемола Лукман Мадриднинг «Атлетико» клубидаги илк ўйинларидаёқ ўзини жуда ёрқин кўрсата олди. Унинг ҳаракатларидан клуб устози — машҳур аргентиналик мутахассис Диего Симеоне жуда мамнун. У Лукманни алоҳида иқтидорга эга футболчи деб атади.

«Унинг хусусиятлари бошқа ўйинчиларимизникидан фарқ қилади. Бизда асосан жамоавий футболчилар йиғилган бўлса, у индивидуал ҳаракатлар устасидир. Аммо айнан шу жиҳат рақиблар учун кутилмаган тарзда ўйин кўрсатишимизга имкон беради. Лукман аллақачон жамоа салоҳиятига кучли импульс олиб кирди», — дея Симеоненинг сўзларини «derbyderbyderby.it» нашри келтирмоқда.

Эслатиб ўтамиз, Лукман бунга қадар бир неча йил давомида Италиянинг «Аталанта» клуби шарафини ҳимоя қилган эди.