"ПСЖ" бош мураббийи Луис Энрике жамоа Чемпионлар лигасида исталган рақиб билан тўқнаш келишга тайёрлигини маълум қилди.

Парижликлар саралаш босқичида "Монако"дан ўтиб (3:2, 2:2), 1/8 финалга йўл олишди. Кейинги босқичда "ПСЖ" "Барселона" ёки "Челси" жамоаларидан бири билан ўйнаши керак бўлади.

"Бу саволни рақибларимизга бериш керак. Кўрамиз, улар нима деб жавоб беришаркин. Қийин бўладими? Йўқ! Бизга қарши ўйнаш жуда, жуда қийин бўлади. Албатта бу саволни уларга (бўлажак рақибларимизга) бериб кўринг.

Биз исталган жамоага қарши ўйнашга, исталган турнирда иштирок этишга тайёрмиз. Ва мақсадимиз битта — ғалаба қозониш. Бу мавсум ўзгача бўлмоқда, чунки кўплаб жамоаларда жароҳат олганлар жуда кўп бўлди. Биз учун ҳаммаси аниқ: бу баҳона эмас, лекин барча ўйинчилар сафда бўлиши муҳим", — деди Энрике Canal+ телеканалига берган интервьюсида.