Мадриднинг "Атлетико" клуби Ла Лига доирасидаги баҳсда "Овьедо" устидан 1:0 ҳисобида кичик ғалабага эришди. "Матрасчилар" устози Диего Симеоне жамоасининг муваффақиятига изоҳ берди.
"Биз жуда муҳим ўйинда ғалаба қозонишга муваффақ бўлдик. Бу уч очко биз учун зарур эди. Учрашув давомида жамоа аста-секин суръатни ошириб борди. Шогирдларим танаффусдан сўнг ажойиб ўйин кўрсатишди ва чиройли гол уришди. "Вильярреал" мағлубиятга учраган эди, шу сабабли биз учун ғалаба қозониш муҳим эди", — дея аргентиналик мутахассиснинг сўзларини келтиради "Into the Calderon".
Мадриднинг топ-клуби 51 очко жамғарди ва Испания чемпионати турнир жадвалида "Вильярреал"га етиб олди.
