«Лилль» ва «Нант» жамоалари ўртасидаги Франция Лига 1 баҳси (1:0) иккинчи бўлимда бир неча дақиқага тўхтатиб қўйилди.
Мезбонларнинг дарвоза ортида жойлашган фанатлар трибунасида «Нант» дарвозабони Антони Лопешнинг онаси шаънига ҳақоратли ҳайқириқлар янгради. Шу сабабли бош ҳакам Тома Леонар учрашувни тўхтатишга қарор қилди.
Ҳакам вазият бўйича ўйин делегатларига хабар берди ва стадион бўйлаб махсус эълон берилишини талаб қилди. Бироздан сўнг ўйин давом эттирилди ва ҳақоратли ҳайқириқлар тўхтади. Шунга қарамай, стадионда ҳеч қандай расмий эълон берилмади.
«Агар сиз бунга эътибор қаратмаганингизда, икки сониядан кейин ҳаммаси ўз-ўзидан тугаган бўларди», — деди «Лилль» ярим ҳимоячиси Бенжамен Андре ҳакамнинг қарорига эътироз билдириб.
