«Арсенал»нинг стандарт вазиятлар бўйича мураббийи Николя Жовернинг шартномасида алоҳида бонуслар кўзда тутилган, деб хабар бермоқда The Athletic.

Манба берган маълумотга кўра, 44 ёшли француз жамоа стандарт вазиятлардан сўнг урган ҳар бир голи учун мукофот пули олади. Унинг Лондон клуби билан келишуви 2027 йилгача мўлжалланган.

«Арсенал» бош мураббийи Микель Артета Жоверни 2021 йилнинг июль ойида «Манчестер Сити»дан таклиф қилган эди. Жорий мавсумда «тўпчилар» бурчак тўпларидан сўнг аллақачон 16 бор рақиб дарвозасини ишғол қилишди — бу клубнинг Англия чемпионатидаги бир мавсум учун мутлақ рекордидир.

Аввалроқ худди шундай кўрсаткични «Олдем» (1992/1993 йилги мавсум), «Вест Бромвич Альбион» (2016/2017) ҳамда «Арсенал»нинг ўзи (2023/2024) қайд этган эди.

Лондонга кўчиб ўтишдан олдин Жовер «Брентфорд»да ишлаган, Хорватия терма жамоаси ва «Монпелье» клубларида таҳлилчи сифатида фаолият юритган.