Европанинг топ-клублари Чемпионлар лигаси учун қайдномани 28 нафар футболчигача кенгайтиришга эришмоқчи.
The Guardian нашрининг хабар беришича, тегишли таклиф УЕФАнинг клублар ўртасидаги мусобақалар бўйича қўмитаси йиғилишида янграган. Бир қатор топ-клубларнинг ҳисоблашича, қайдноманинг кенгайтирилиши ўйинчиларнинг юкламасини камайтиришга, натижада жароҳатлар сонини камайтиришга ва ўйинларни янада рақобатбардош қилишга имкон беради.
Қайд этилишича, кенгашда иштирок этган 16 та клубдан айримлари бундай ўзгаришларга қатъиян қарши чиққан. Уларнинг фикрича, қайдноманинг кенгайтирилиши иқтидорли футболчиларнинг топ-клубларга оқиб ўтишига сабаб бўлади ва якунда Европа футболидаги рақобатга зарар етказиб, "кучли бешлик"дан ташқаридаги лигалар даромадига зарба беради.
Муҳокама натижасида ушбу масала бўйича ҳеч қандай қарор қабул қилинмади, бироқ келажакда эҳтимолий ислоҳот борасидаги музокаралар давом эттирилиши кутилмоқда.
Эслатиб ўтамиз, айни дамда клублар Чемпионлар лигаси учун 25 нафардан кўп бўлмаган футболчини қайдномадан ўтказишлари мумкин.
