«Манчестер Юнайтед»нинг бразилиялик ярим ҳимоячиси Каземиро Лондонга кўчиб ўтиши мумкин. Бу ҳақда Topskills Sports нашри хабар бермоқда.

Манбанинг маълумотига кўра, «Арсенал» 34 ёшли футболчини мавсум якунланганидан сўнг ўз сафига қўшиб олиш учун унинг агенти билан аллақачон боғланган. Каземиро «канонирлар» бош мураббийи Микель Артетага жуда ёқади ва у бундай тажрибали ярим ҳимоячининг келиши клубга йирик совринларни қўлга киритишда ёрдам беради деб ҳисоблайди.

Шу билан бирга, Каземиро билан «Милан» ва «Ювентус» клублари ҳам алоқага чиққани айтилмоқда, бироқ футболчининг ўзи айнан «Арсенал»га ўтишни афзал кўрмоқда.

Жорий мавсумда бразилиялик футболчи барча турнирларда 28 та ўйинда майдонга тушиб, 6 та гол урди ва 2 та голли узатмани амалга оширди. Хавбекнинг «Манчестер Юнайтед» билан шартномаси шу ёзда ниҳоясига етади.