Мадриднинг «Атлетико» клуби ҳимоячиси Хосе Хименес жамоасининг ўйинлар тақвими жуда тиғизлигидан норозилигини билдирди.

«Бу жуда қийин. Бизга дам олиш керак. Футболчилар ўзларини хавф остига қўйишмоқда, биз ҳозир худди циркдаги масхарабозлардекмиз. Бизга қачон айтишса, ўшанда ўйнашга мажбурмиз», — дея ҳимоячининг сўзларини келтиради Marca газетаси.

Шанба куни, 7 мартда Диего Симеоне шогирдлари ўз майдонларида «Реал Сосьедад» устидан 3:2 ҳисобида ғалаба қозонишди. Мадрид жамоаси навбатдаги учрашувини УЕФА Чемпионлар лигаси 1/8 финали доирасида Лондоннинг «Тоттенхэм» клубига қарши ўтказади. Баҳс сешанба куни, 10 мартда бўлиб ўтади.