«Барселона» бош мураббийи Ханс-Дитер Флик Чемпионлар лигаси 1/8 финали доирасида «Ньюкасл»га қарши кечган баҳс (1:1) ҳақидаги таассуротлари билан ўртоқлашди.

Каталонияликлар қарама-қаршиликнинг дастлабки учрашувида 96-дақиқада Ламин Ямал томонидан амалга оширилган пенальти эвазига мағлубиятдан қутулиб қолишди.

«Биз энг яхши ўйинимизни ўтказмадик, тўпни жуда кўп йўқотдик, аммо ўз имкониятимиздан фойдалана олдик. «Ньюкасл» тезкор ва динамик ҳаракат қилди, шу сабабли бизга осон бўлмади, лекин ҳимояда қандай ўйнаганимиздан кўнглим тўлди.

Бу ердаги дуранг — яхши натижа, бироқ биз ўз ўйинимизни кучайтиришимиз керак. «Камп Ноу»да сиз тамоман бошқача ўйин гувоҳи бўласиз», — деди Флик матбуот анжуманида.