«Барселона» клуби вингер Маркус Рэшфорднинг ўрнига муқобил вариантларни ўрганмоқда. Англиялик футболчи айни дамда «кўк-анорранглилар» сафида «Манчестер Юнайтед»дан ижарага олинган ҳолда тўп сурмоқда. Каталония клуби 28 ёшли ўйинчининг трансферини тўлиқ сотиб олишга қизиқиш билдирмоқда, бироқ «қизил иблислар» билан ҳозирча келишувга эришилмаган.

«Marca» нашрининг хабарига кўра, агар Рэшфордни сотиб олишнинг иложи бўлмаса, «Барселона» эътиборини Абде Эззалзули номзодига қаратади. Марокашлик футболчи жорий мавсумни «Бетис» сафида жуда яхши ҳолатда ўтказмоқда.

Эслатиб ўтамиз, Эззалзули «Бетис»га ўтишдан олдин айнан «Барса» шарафини ҳимоя қилган ва каталонияликларда уни биринчи навбатда сотиб олиш ҳуқуқи сақланиб қолган. «Transfermarkt» портали 24 ёшли марокашлик вингернинг қийматини 20 млн еврога баҳоламоқда.