«Манчестер Сити» бош мураббийи Хосеп Гвардиола Англия чемпионати доирасидаги «Вест Хэм»га қарши бўлажак ўйин ҳақида ўз фикрларини билдирди.

«Ҳозир биз фақат «Вест Хэм» ҳақида ўйлаяпмиз. Бундай ўйинлар кўп жиҳатдан жуда қийин кечади. Нимадир ўхшамаслиги ҳам мумкин. Аввал ушбу учрашувни ўтказиб олишимиз керак, «Реал»га қарши имкониятларимиз бор-йўқлиги ҳақида эса кейин бош қотирамиз. Бизда «банкдаги долларлар» (имкониятлар захираси) у қадар кўп эмас, лекин кўрамиз. Ҳозирги мақсад — «Вест Хэм».

Премьер-лига — ютиш энг қийин бўлган турнир. Биз ҳали ҳам чемпионлик пойгасидамиз, аммо тушуниб турибмизки, агар очко йўқотсак — ҳаммаси тугайди», — деди Гвардиола матбуот анжуманида.

Ҳозирда «Манчестер Сити» битта захира ўйинига эга бўлган ҳолда, пешқадам «Арсенал»дан етти очко ортда қолмоқда.