«Ливерпуль» бош мураббийи Арне Слот «Тоттенхэм»га қарши учрашувда вингер Рио Нгумоханинг кўрсатган ўйини ҳақида ўз фикрлари билан ўртоқлашди.

17 ёшли футболчи «қизиллар»нинг асосий таркибида майдонга тушди ва ўзини ёрқин тарзда кўрсата олди. Вундеркинд майдонда атиги 64 дақиқа ҳаракат қилган бўлса-да, муваффақиятли алдамчи ҳаракатлар (дриблинг) сони бўйича энг яхши натижани (еттита) қайд этди.

«Рио ўйиндан завқ олди, буни кузатиш мен учун ҳам ёқимли бўлди. У ушбу мавсум давомида сезиларли даражада ўсишга эришди. У бор-йўғи 17 ёшда, Премьер-лигада илк бор асосий таркибда майдонга тушди, лекин рақиблар учун доимий равишда хавф туғдириб турди. Шубҳасиз, бу ўйиннинг ижобий жиҳатларидан биридир», — деди Слот.