«Фулхэм» яқин вақт ичида Лондоннинг «Арсенал» клуби тарбияланувчиси Дэн Кейси билан шартнома имзолаши кутилмоқда. Бу ҳақда Sky Sports нашри хабар бермоқда.

Футболчи тиббий кўрикдан муваффақиятли ўтди ва икки йиллик дастлабки шартномага имзо чекиши кутилмоқда. 18 ёшли ўйинчи «Фулхэм»даги фаолиятини клубнинг 21 ёшгача бўлган (U21) жамоасида бошлайди.

Ҳужумкор ярим ҳимоячи ўтган ёзда бошқа вариантларни кўриб чиқиш мақсадида профессионал шартнома имзолашдан бош тортиб, «Арсенал»ни тарк этган эди. Аввалига унинг «Кристал Пэлас»га ўтиши амалга ошмади, кейинчалик у «Манчестер Сити» ва «Фейеноорд» клубларида машғулотлар ўтказди.

Кейси 7 ёшида «Арсенал» академиясига қўшилган ва ўтган мавсумда клубнинг 18 ёшгача бўлган жамоасида порлаган эди — у 21 учрашувда 18 та гол уришга муваффақ бўлган. Шунингдек, у U19 ва U21 жамоаларида ҳам тўп сурган ҳамда Микель Артета қўл остида асосий жамоа билан машғулотларда иштирок этган.

Кейси Лондонда туғилган бўлса-да, Италия терма жамоасида ўйнаш ҳуқуқига ҳам эга. Футболчи «Фулхэм»га мослашиб олгач, Италия ёшлар терма жамоасига чақирув олиши кутилмоқда.